Сёння ў «Доме прэсы» адбылася прэс-канферэнцыя па тэме «Паляпшэнне дэмаграфічнага патэнцыялу: меры па павышэнню нараджальнасці і зніжэнню смяротнасці ў Рэспубліцы Беларусь». У прэс-канферэнцыі прынялі ўдзел дэпутат Палаты прадстаўнікоў Нацыянальнага сходу Рэспублікі Беларусь Анатоль Дашко, начальнік галоўнага ўпраўлення арганізацыі медыцынскай дапамогі, экспертызы, звароту грамадзян і юрыдычных асоб Міністэрства аховы здароўя Алена Богдан, прадстаўнікі Міністэрства працы і сацыяльнай абароны, Мінгарвыканкама і Беларускай праваслаўнай царквы.

На пачатку прэс-канферэнцыі Анатоль Міхайлавіч сказаў: «Я вам не адкрыю ніякага сакрэту, што наша краіна, як і ўсе іншыя, сутыкаецца з такой праблемай, як зніжэнне нараджальнасці». Пасля чаго дадаў: «У краіне зараз створаны ўсе ўмовы, каб насельніцтва жыло даўжэй. З 2017 года чаканая працягласць жыцця складае 74-75 гадоў. Гэты паказчык кажа пра тое, што насельніцтва будзе старэць, а каэфіцыент старэння будзе расці. У сваім Пасланні Кіраўнік дзяржавы сказаў, што дэмаграфія – гэта наша будучыня, і калі мы не зможам яе паляпшаць, то будучыня краіны будзе не вельмі простай!» У канцы сваёй прамовы дэпутат выказаў падзяку Міністэрству аховы здароўя за правядзенне такога мерапрыемства, як «Адкрытыя радзільныя дамы». Ён мяркуе, што менавіта такая дзейнасць дапамагае ўмацаваць унутрысямейныя адносіны.

Трэба дадаць, што ў краіне вельмі шмат робіцца для падтрымкі сям'і, асабліва для шматдзетных сем'яў. Плануецца, што толькі ў гэтым годзе каля 12 тыс. шматдзетных сем'яў атрымаюць кватэры, акрамя таго, праграма сямейнага капіталу будзе працягнутая. Здаровы лад жыцця і спорт – прыярытэтныя накірункі развіцця Рэспублікі Беларусь. Таксама на прэс-канферэнцыі быў абмеркаваны новы трэнд у сацыяльнай палітыцы дзяржавы «Здаровы горад і здаровы пасёлак».

Алена Богдан, адказваючы на пытанні журналістаў, сказала: «Сістэма аховы здароўя ў нашай краіне працуе па двух напрамках – павелічэнне нараджальнасці і памяншэнне смяротнасці. Беспрэцэдэнтныя меры сацыяльнай палітыкі дазволілі нам да 2016 года бачыць практычнае змыканне дэмаграфічных нажніц за кошт павелічэння нараджальнасці. Сістэма аховы здароўя павінна быць гатовая да далейшага павелічэння нараджальнасці. Сёння мы ідзем шляхам паляпшэння ўмоў, каб жанчыны адчувалі сябе камфортна падчас родаў. І перш за ўсё – гэта доступ сям'і ў родах і пасляродавым перыядзе. Запатрабаваным стала індывідуальнае вядзенне родаў. Пры гэтым жанчына не плаціць за роды, яна плаціць за індывідуальную палату і догляд за ёй. У палаце разам з жанчынай можа знаходзіцца маці, сяброўка, але часцей за ўсё, што не можа не радаваць, гэта муж».

Пасля чаго яна дадала, што цяпер вельмі важным падзелам для захавання жыцця грамадзян з'яўляецца стварэнне спецыялізаваных цэнтраў. Алена Богдан праінфармавала журналістаў: «На працягу некалькіх гадоў мы павінны завяршыць праграму развіцця міжрэгіянальных і міжраённых цэнтраў, абсталяваць іх, а таксама стварыць у цэнтрах спецыялізаваныя аддзялення па лячэнні вострага каранарнага сіндрому, вострых парушэнняў мазгавога кровазвароту, цяжкай спалучанай чэрапна-мазгавой траўмы».

Для павышэння даступнасці аказання меддапамогі ўсю тэрапеўтычную службу пераводзяць на працу лекараў агульнай практыкі. У пачатку года за кошт сродкаў рэспубліканскага бюджэту пачаліся пастаўкі неабходнага абсталявання для аснашчэння працоўных месцаў лекараў агульнай практыкі.

Таксама Алена Богдан паведаміла, што ў гэтым годзе ў Дзяржаўны рэестр тэхнічных сродкаў сацыяльнай рэабілітацыі плануецца ўключыць апараты ШВЛ для дарослых. Некалькі гадоў таму ў гэты пералік ўнеслі партатыўныя апараты для дзяцей. Гэта была ініцыятыва Беларускага дзіцячага хоспіса. Сёння каля 30 дзяцей пражываюць дома, знаходзячыся на дапаможнай вентыляцыі лёгкіх, што значна павышае якасць жыцця дзяцей. «У нас ёсць прыклады, калі дзеці, якія знаходзяцца на апараце ШВЛ, не толькі скончылі школы, але і дыстанцыйна паступалі ў вышэйшыя навучальныя ўстановы», – патлумачыла Алена Богдан. Востра стаіць пытанне з дарослым насельніцтвам. Сёння ёсць методыкі з выкарыстаннем дапаможных механізмаў дыхання, якія падаўжаюць жыццё і паляпшаюць яго якасць. Знаходжанне на дапаможнай вентыляцыі лёгкіх дазваляе людзям быць дома, а ў асобных выпадках нават дыстанцыйна працаваць.

Прэс-служба Міністэрства аховы здароўя